2025-жылдын 24-октябрь күнү Кадамжай шаарында Баткен согушунун эскерүү күнүнө арналган салтанаттуу иш-чара өттү. Иш-чара Баткен окуяларында эрдик көрсөтүп курман болгон жоокерлерге арналган эстеликке гүл коюу менен башталып, алардын элесине таазим көрсөтүлдү.
Иш-чарага Кадамжай райондук мамлекеттик администрациясынын аппарат жетекчиси, райондук ички иштер бөлүмүнүн башчысы, мекеме-ишканалардын жетекчилери, жергиликтүү өз алдынча башкаруу органдарынын өкүлдөрү, Баткен согушунун ардагерлери жана жаштар катышты.
Салтанатта жоокерлердин Мекенди коргоодогу эрдиги жана баатырдыгы баса белгиленип, ардагерлерге ыраазычылык билдирилди. Иш-чаранын жүрүшүндө мекендин бүтүндүгүн камсыз кылуу үчүн өмүрүн арнаган жоокерлердин элесин урматтоо — ар бир жарандын ыйык милдети экендиги айтылды.
Белгилей кетсек, Баткен согушуна Кадамжай районунан 270 жоокер катышкан. Учурда алар коомдук турмушка жана өлкөнүн коопсуздугуна активдүү салым кошуп келишүүдө.
