Дарыяны булгаган мал союлчу жай жабылып, заттары ташталган жер көмдүрүлдү
2
Аксы районунун Кызыл-Жар айылындагы Нарын дарыясын булгаган мал союлчу жай жабылып, заттары ташталган жай көмдүрүлдү. Бул тууралуу Үч-Коргон айыл өкмөтүнөн билдиришти.
Маалым болгондой, тазалоо иштери кечээ, 2-майда жүргүзүлгөн.
“Интернетте чыккан жай боюнча райондук ветеринардык башкармалыгынын жетекчиси, райондук экологиялык көзөмөл инспектору текшерүү жүргүзүштү. Аталган жай жабылды. Таштандылар тазаланып, сүрүп тегиздеп иретке салынды”, — деп берилет маалыматта.
Эске салсак, буга чейин Аксы районунун Кызыл-Жар айылындагы мал союлчу жайдан чыккан кандар Нарын дарыясына куюлуп, жагымсыз таштанды заттар үйүлүп жаткан видео интернетке чыккан эле.
