Бишкекте 1кгдан ашык баңгизат менен жубайлар кармалды
28
Кыргызстан менен Орусиянын тиешелүү кызматтары биргелешип жүргүзгөн атайын операциянын алкагында Бишкекте 1995-жылы туулган жаран жана анын жубайы кармалды.
ИИМдин маалыматына караганда, жаран почта аркылуу алган аба муздаткычтын конструкциялык көңдөйүнөн жалпы салмагы 1 килограмм 126 грамм «Alpha-PVP» табылган. Үйүн тинтүү учурунда психотроптук заттарды өлчөө жана таңгактоого арналган электрондук тараза, зип-пакеттер жана изолента алынган.
Алдын ала эсеп боюнча, баңгизатты саткан учурда мыйзамсыз киреше 4 миллион 900 миң сомдон ашмак. Операциянын натыйжасында психотроптук заттын 6 миң 800дөн ашык бир жолку дозасынын таралышына бөгөт коюлган.
Учурда кылмыштуу каналдын башка катышуучуларын аныктоо боюнча тергөө иштери уланууда.
