Быйыл Кыргызстанда 1,5 миңден ашык адам кенеден жабыркады
1
2026-жылдын 1-январынан 25-июнуна чейин Кыргызстанда кене чаккан 1 миң 569 учур катталды. Бул көрсөткүч 2025-жылдын ушул эле мезгилине салыштырмалуу 2,7 эсеге көп. Бул тууралуу Ооруларды алдын алуу жана мамлекеттик санитардык-эпидемиологиялык көзөмөл департаменти билдирди.
Маалыматка ылайык, жабыркагандардын арасында кене аркылуу жугуучу инфекциялардын 17 учуру аныкталган. Алардын ичинен 3 учур кене энцефалити, 14 учур кене риккетсиозу болуп саналат.
Кене чаккан учурлардын эң көп катталганы Бишкек шаарында (656), Чүй облусунда (480) жана Ысык-Көл аймагында (334) байкалган.
Адистердин белгилешинче, учурлардын көбөйүшү климаттык шарттарга, кенелердин эрте активдешүүсүнө, алардын жайылуу аймагынын кеңейишине жана калктын жаратылыш аймактарында көбүрөөк эс алуусуна байланыштуу болушу мүмкүн.
